கோவை, மே 29:
கோவையில் உலகத் தமிழ் செம்மொழி மாநாட்டுக்காக 30 செல்போன் டவர் அமைக்கப்பட்டு வருகிறது.
கோவையில் தனியார் மற்றும் பி.எஸ்.என்.எல் தொலை தொடர்பு துறையின் ஆய்வு கூட்டம் நேற்று நடந்தது. இதில் மத்திய அரசின் தொலை தொடர்பு துறை (டெலிகாம் கமிஷன்) தொழில்நுட்ப உறுப்பினர் சந்திர பிரகாஷ், தமிழக தொலை தொடர்பு துறை (டெர்ம்) துணை பொது இயக்குநர் ரகுநந்தன் மற்றும் 10 தனியார் செல்போன் நிறுவனங்களை சேர்ந்த நிர்வாகிகள் கலந்து கொண்டனர்.
கோவையில் நடக்கும் உலகத் தமிழ் செம்மொழி மாநாட்டுக்காக, பீளமேடு கொடிசியா வளாகத்தில் செல்போன் டவர் அமைத்தல், பராமரித்தல் குறித்து இக்கூட்டத்தில் விவாதிக்கப்பட்டது. தனியார் செல்போன் நிறுவனங்களுக்கு பி.எஸ்.என்.எல். சார்பில் பல்வேறு ஆலோசனைகள் தெரிவிக்கப்பட்டது. இதைதொடர்ந்து சந்திரபிரகாஷ், ரகுநந்தன் ஆகியோர் நிருபர்களிடம் கூறியதாவது;
செம்மொழி மாநாடு நடக்கும் கொடிசியா வளாகத்தில் 30க்கும் மேற்பட்ட செல்போன் டவர் அமைக்கும் பணி நடக்கிறது. அதிகளவில் நடமாடும் செல்போன் டவர்கள் அமைக்கப்படும். வாகனங்களில் செல்போன் டவர் அமைத்து, கொடிசியா வளாகத்தில் ஆங்காங்கே நிறுத்தி வைக்க திட்டமிடப்பட்டுள்ளது. சம்பந்தப்பட்ட செல்போன் நிறுவனங்கள் இதற்கான பணிகளை மேற்கொண்டுள்ளது.
பிஎஸ்என்எல் சார்பில், 5 அரங்குகளில் பைபர் ஆப்டிக்கல் கேபிள் வசதி அமைக்கும் பணி நடக்கிறது. இதில் அகன்ற அலைவரிசை இணைப்பு வழங்கப்படும். இதற்காக சுமார் 1 கோடி ரூபாய் செலவிடப்படும். மாநாடு நிகழ்வில் 2 லட்சத்திற்கும் மேற்பட்டவர்கள் கலந்து கொள்வார்கள் என எதிர்பார்க்கப்படுகிறது. கூட்டம் மிகுதியாக உள்ள இடத்தில் செல்போன் சிக்னல் பிரச்னைகளை சமாளிக்கும் வகையில் திட்டம் தயாரிக்கப் பட்டுள்ளது. கூடுதல் டவர் அமைப்பதன் மூலம் சிக்னல், இணைப்பு தடைபடுவது போன்ற பிரச்னை ஏற்படாது. சில செல்போன் நிறுவனங்கள் கூட்டாகவும் டவர் அமைக்கும் பணியில் ஈடுபட்டுள்ளது. ஒரு வாரத்திற்குள் பணி முடிந்து விடும். மாநாடு வளாகம் முழுவதும் கம்பியில்லா இணைய தள வசதி செய்யப்படுகிறது. மாநாட்டில் பங்கேற்பவர்கள், மீடியா, பத்திரிகையாளர்கள் கம்ப்யூட்டர், லேப்டாப், செல்போன்களை எளிதாக தடையின்றி இயக்க முடியும் என்றனர்.
Source : Dinakaran
